سؤال لكل عزوبي .. يتسدح بالملحق ؟
هل تنام على بطنك ؟ او تخم الوسادة بالليل ؟ او تعفس الكنب وتعضه وتسعبل عليه وانت نايم .. او تنام في الشوارع كأنك قطو .. او تنام على الكنب وانت تقرأ الجريده ، او تنام ويطلع سرك ))ستر الله سرك((.
إذا كانت الاجابة بنعم فإن
كل هذه اعراض لرغبة جامحه وكامنه بالزواج وان ما تلاحقت عمرك راح يجي اليوم اللي يقول فيه أبوك لك :
" الله لا يبارك في الساعة اللي جبنا فيها شغاله ". 
لا تتخذ قرار الزواج إلا وانت في حالة هدوء تااام بعيدا عن الاثارة والعواطف الجياشه ..
مو تشوف فيديو كليب بعدها تطمر لأمك وانت مشبك اصابعك ومميل رقبتك وتقول ( دوروا لي ابي اعرس ) ، ابي اكمل نصف ديني .
اولاً : مرحلة ما قبل الزواج :
كيف تعرف انك أستويت عزيزي الشاب وحان قطافك من بنت الحلال :
أ: علامات الرغبة في الزواج عند الشاب :
1 - إذا بديت تحب الاغاني وتسمعها بمخمخه وتتخيل انك تقول الكلام لوحده .. فاعرف انك ( قاضي ) فتلاحق عمرك وشف لك بنت حلال ، بشرط توافر الشروط الاخرى فيك
( وظيفه مناسبة ، ومبالغ مالية لمواجهة مصاريف العرس ) >>>> التقسيط متاح بدون كفيل في مؤسسة مباري للعرس على النوته
كذلك إذا صرت تتابع الفيديو كليب و تفتح ثمك ولو يناديك ابوك ما ترد عليه.
2– إذا بديت تقول يا زين بيروت والـ إل بي سي والمستقبل وأنا معجب بستارأكدمي ؟ فاعلم اخي الاع** انك لو انتظرت سنتين بتصدّي صواميل ظهرك وتصير بلا مستقبل.
3– إذا بديت تمشى بالسوق وتتمنى ان البنت اللي قدامك يطيح اللي هي شايلته علشان تصدم فيها وتقول ( ليمون نعناعه ) فاعرف انك قابل أن تكون مشرووع ( سبهه ) وشهار ما يقبلك ولا منتسب .
ملاجظة : (ليمون نعناع ----- دعاية معجون أسنان سجنال 2 //// شهار ------- مشتشفى المتخلقين عقلييا بالطايف )
7 – إذا بديت تعطّر بعطور نسائيه وتقول ما فيها شيء ( العطورات ليست حكرا على احد ) .. فاعرف انك بديت ( تخق ) لذلك اكرب عمرك واعرس.
ثانيا : اثناء الخطبة :
1 – انضبط وابدأ صل بالمسجد . واجعل المحافظة على الصلاة تحول دائم من الخطبة إلى آخر عمرك.
لان اهل البنت يبي يسألون شيبان المسجد ويقولون تعرفون فلان .. لذلك صل وابد ( طلطل ) بوجيه المصلين كأنك تدور اخوانك.<<<< ما احب هالحركه.
2 – لا تتهيبل وتروح تتسلف سيارة زميلك ( الفخمة ) وترزها عند باب اللي انت خاطب منهمl
لأن الخطيبة مصيرها تعرف ان السياره مو سيارتك وبالتالي تطيح من عينها .. بكيفها ..
3 - اثناء الشوفه لا تستحي ابدا وقز البنت من راسها لرجليها ولا يهمك ابوها واخوانها لأن الشرع ( يدعمك ) وان قالوا شيء .. قل لهم حديث الرسول صلى الله عليه وسلم
" فلينظر اليها وتنظر اليه فأنه احرى ان يؤدم بينهما "
وكما قال الشاعر ( لسان الفتى نصف ونصف فؤاده ** فلم يبق الا صورة اللحم والدمِ )
4- في الخطبة ان صار فيه مكالمات بعد ما يوافقون عليك .. فلا تصير لصقه وعلة وريد كل دقيقة داق على البنت .. ( وينكم فيه ) ؟ وش سويتوا اليوم ؟ ما اشتقتي لي؟ وش رايك بأسلوبي وش تسوين ؟ أنا أحس أني مبسوط لية؟ انت على السرير وإلا في المقلط ؟ << يخرب بيت السؤال ؟
5 - لو ( كتبت كتابك ) على البنت قبل بفترة وبديت تأثث بيتك .. لا تاخذ البنت إلا علشان تختار غرفة نومها بسسسسسسسسس ، وإلا باقي الاثاث اختاره انت وإلا خلها هي اللي تختاره كله ..
لانكم إذا بديتوا تطلعون مع بعض تختارون الاثاث .. فراح يطلع الاثاث مشكل تشكيلة عجيبه والوانه كأنها ( شرّاب تكرونيه عند الحرم )..
..
كذلك اضبط ميزانيتك على مستوى معين من الأثاث بمعنى .. ما تشتري لي لوحه بــ 3000 الاف والكنبات بـ 5000 الاف .. يعني ما فيه توازن وتروح تشتري لوحه ثانية من ( حلة بن دايل ) بــ 20 ريال ، ومن ايكيا بــ 150 ريال .. فيصير بيتك كأنه
( حراج ابن قاسم ) من كل بحر قطره.
فتصير مثل اللي بيتهم طين وعندهم ( رولز رويس ).
ملاحظة : (حلة بن دايل ----- سوق شعبي //// حراج بن قاسم ------- حراج لبيع المستعمل الي رااايح فيها من جد )
6 – إياني وياك تظهر بشكل مثالي في الخطبة لكن خلك على طبيعتك ، بحيث تقول للبنت هذا اناااا ..
مو تصير حبيّب بالخطبة وصدام بعد الملكة.
ثالثا : ليلة الزواج :
ليلة العمر والليلة الوحيده اللي تحس فيها انك أهم واحد بالإحتفال .. فلا تصدق عمرك إذا قالتلك أمك (( الله يحفظ أمهاتنا و أبواننا لنا يارب )) ياملح ولدي ..والله أنة يهبل.. الله يحرسة من الناس.. طالعا كنة أمير.. كنه ابوة يوم ياخذني ........... ويكبر راسك.. وتاخظ مقلب بنفسك .... ثم تزلق عند باب القاعة وتصير مسخرة ..... خلك طبيعي
خذ معك علك وفرش أسنانك عشان وراك سلام على المعازيم في القاعة(( لا تخيسهم )) ولا تكثر من شرب الشاي والقهوة ليلة العرس بعدين تنتفخ مثانتك ، فتتورط ، لأنه صعب إذا رحت جلست مع العروس على ( الكوشه ) .. فجأه تقوم تقول بعد اذنك باروح الحمام .. صدقني راح تقول البنت إللي هذا اوله ينعاف تاليه
.. فلنفرض انك قمت من الكوشه ؟؟!!!!
بعد ما تخلص بترجع وتجلس مع العروس مره ثانية ؟؟
وإلا بتطلع من هناك ؟ بالعربي .. انت بتبلش بلشة ما بعدها بلشة
أما إذا رجعت بيقولون الحريم ( جاه اسهال من الخوف من المدام )
اجل إذا راحوا الشقة بلحالهم وش بيسوي هالخواف.؟
فتصير علك في فم الرايح والجاي وملطشه للصغير والكبير.
2 – ليلة العرس ارفق على سيارة الرجال اللي انت متسلفها منه .. لانك ممكن تصدم لانك ما تعودت انك تكون بسياره كشخه وجنبك بنت.
<<<<<<< وش دراك؟
3 - خلك ذوق واسحب يد البنت وحطها على ( القير حق السياره )
وحط يدك فوقها ولا تكثر تفغيص((تظغط)) يدها لانك بتتهور وممكن يصير لك شيء وإلا يجيك ( شد عضلي ) بعدين تصدم بإشاره
>>> لاحقين خير ان شاء الله ..
4 - إذا جيتوا تدخلون البيت .. افتح الباب وخلها تدخل قبلك وأمزح معها شوي ( خشي برجلك اليمين ) وبعد ما تدخلون ( أرقع ) ذيك الزغروته اللي تهز اركان البيت ..
ثبت الله اركانك .
رابعا ً : سواليف ليلة العرس :
الكثير من الشباب في أي المواضيع يطرح ليلة الزواج وبرأيي انه بالامكان طرح مواضيع تتعلق بذكريات الخطوبة .. والابتعاد عن المواضيع الرسمية .. بمعنى تجنب الآتي :
–1 انتبه تتميلح او تنكت اكثر من اللزوم لان الموضوع سينقلب ضدك وبدال ما تصير وش زينك تصير ( كخاااااا ).
2 – انتبه تجيب طارئ ( أمك ) ليلة العرس ، وتقعد تقول لبنت الناس من اول ليلة ( انا بصراحه امي أغلى امرأة عندي بالعالم ).. انا امي بصراحه ابيك تشيلينها فوق راسك ، انا امي بصراحه ما ابي احد يزعلها ، انا امي بصراحه مالها غيري ..
الله يأخذ بليسك انت وامك لا هالحين ألحطك بالعقال حقك ..
((تراني أعصب احيانا بدون سبب مقنع .. ما عليه رجعت طبيعي .. نكمل ..))
مافيه شك ان الام قدرها غالي ومكانتها عظيمه بس لكل مقام مقال .. فما فيه مناسبه انك تجيب طارئ امك ، ممكن تأجل الموضوع لليلة اخرى بعد ليلة الزواج ونتو بالطياره مسافرين ((حاقة زي كدة)).
3 – امدح مكياج المدام ، وفستان فرحها لانها تعبت شهور حتى تظهر بهذا المظهر اللي انت تتمتع فيه انت وعيونك المغمصه | ..
حتى لو كنت ( كمخه وسبهه ) في مواضيع الذوق واللبس ولا تفهم فيها شيء أمدح وخلك عباراتك فيها صدق بحيث تكون ( الكذاب الصادق ) ..
فهذا من شأنه أنه يحسس المدام انها جميله بعينك ، ويرفع روحها المعنوية ، ويخليها تهضمك يا ابو كوع وركبة ( بنية )<<< مفروكة لين قالت بس فتغيرت من اسود الى بني .
4 – أنبته ثم أنتبه انك تصير عاطفي او تخق ومن اول ليلة تقول للبنت ( بصراحه انا احبك وميت فيك ) .. لانها مؤكد انها مو مصدقتك ( ما امداك بسم الله تحبها ).
بصراحه كثير من الشباب محروم من ( كل شيء ) <<< وافهموها .. عاطفيا و... و .
واول ما نلمس يد تختلف عن يد صديقك ( الضب ) .. نخق وبسرعه نسعبل ونقول : آآآه الله لا يحرمني منك ، احبك احبك احبك .. ويمكن بعد اسبوع اكرهك اكرهك اكرهك.>>> يااااي .
خلك ثقل وخلي سلوكك هو اللي يقول للبنت اني احبك مو اساليب ( قردنه ) احبك بعدين تقول لها ( وش رايك نلعب عريس وعروسه )؟
ترى هالحركات ما تمشي على البنات التاليات .
معاني الكلمات : قردنه : محاولة اقناع جاده يتخللها وضع اليد على الكتف مع تــنــزيل الرأس وكأنك بتقول سر للطرف الآخر مع الاتجاه ( لقرنة ) الغرفه.
خامسا : ملابس ليلة العرس
1 - بعد ما تفسخ ثوبك وشماغك وعقالك .. تروش الله يصلحك لانه ممكن ريحتك تكون طالعه وانت ما تدري من كثر السلام والقلق اللي عشته في قصر الافراح ولا يهمك انك راش لك كم ( بخه ) على الش***ات اللي بصدرك وبازن بها.
تنظفوا !!!
بعد الانتهاء انتبه تلبس ملابس تظهر مفاتنك .. مثلا تجي بلبس داخلي وفانيلة علاقي وتصير كأنك من ذولاك المصاريه اللي اسود وابيض ويطبون في المسبح
2 - انتبه تصير قروي وتلبس سروال ابو حبل ذاك اللي يخليك كأنك بقره رايحين يبيعونها ، او بيجامة نوم مخططه فتصير كأنك ( حمار وحش ) يتكلم عربي.
اختر اللبس المناسب لجسمك ..
مثلا شورتات رياضيه اذا كان جسمك رياضي .. وإلا اذا كنت دب فخلك بثوبك وشماغك بالعقالك ونم فيها ......
07-23-2005, 10:51 AM
خـــاص بالشباب فقط ....نصائح من أول ما تفكر بالزواج حتى ليلة الدخلة!! 
العرض العادي
